Савол: Эр билан хотиннинг закотлари алоҳида ҳисобланадими?

Жавоб: Динимизга кўра, эр-хотиннинг бойликлари алоҳида бўлади. Бир-бирига қўшилмайди. Сиз бой, эрингиз фақир бўлиши ёки аксинча бўлиши мумкин. Ким бой бўлса, ўз закотини беради.

Эрингизга эмас, ўзингизга тегишли қарз бўлса, мавжуд пулингиздан буни айирасиз. Олтинларингизни тортиб, оладиган пулларингиз билан бирга ҳисоблайсиз. Барчасининг қирқдан бирини олтин билан солиҳ бир фақир мусулмонга берасиз. Уй, дўкон, автомобиль каби нарсалар закот нисобига қўшилмайди. Яъни закотлари берилмайди.

Савол: Ўз пулимни хоҳлаган жойимга сарфлай оламанми? Билагузукларим кўп, ўз закотимни ўзим беришим керакми?

Жавоб: Ўз пулингизни шаръий жойларга истаганингизча сарфлай оласиз. Эрингиз бунга аралаша олмайди. Агар тўсқинлик қиладиган бўлса, зулм қилган бўлади. Унинг пулини у истамаган жойларга сарфлашингиз дуруст эмас. Агар рухсат берган бўлса, истаган жойга бериб, истаган нарсани сотиб олишингиз мумкин. Рухсатсиз сарфлаш тўғри эмас.

Билагузукларнинг закотини ўзингиз берасиз. Ўз пулингиздан беришингиз керак. Эрингиз ҳадя қилган пул бўлса, ана шундан беришингиз мумкин. Ҳадя сифатида олган пуллар сизники бўлади. Закотни беришга эрингиз рози бўлмаса ҳам мутлақо беришингиз керак. Уни хабардор қилмай берасиз. Эрингизнинг рози бўлиши шаръан тўғри бўлган ишлардагина муҳим. Сиз закот берганингиз учун сиздан рози бўлмаса, бунинг ҳеч қандай қиймати йўқ.

Савол: Эримнинг нисоб миқдорида олтини бор. Закот борасида иковимиз алоҳида-алоҳида ҳисоблаймизми ёки бу олтиндан қарзларимизни чиқариб ташлаб сўнгра қолганидан закот берамизми?

Жавоб: Иковингиз алоҳида одамсиз. Хотин бой бўлса, закотни ўзи беради. Қарз кимники бўлса, қарзларини олиб ташлагандан кейин қолган бойлиги нисоб миқдорида бўлса ва нисобга етганидан кейин орадан ҳижрий бир йил ўтган бўлса, закотини беради.

Савол: Рафиқамнинг ўрнига ундан рухсат олмай закотини бера оламанми?

Жавоб: Закотни ҳамма ўзи беради. Рухсат олмасдан бера олмайсиз. Сизни вакил этиб тайинласа, яъни менинг закотимни бир мусулмон фақирга бер деса, ўз пулингиздан ҳам беришингиз мумкин.

Савол: Эр-хотин ишлаб, пулни бирга жамғарган. Иккаласининг жамғарган маблағи нисоб миқдорига етган. Лекин бўлиб олишса, нисобга етмайди. Закотини қандай беришади?

Жавоб: Айтайлик, иккови жамғарган маблағ 100 грамм олтинга тенг. Бир киши учун нисобга етса ҳам икки кишига нисобга етмайди. 50 грамм бириники, 50 грамм наригиники. Динимизда ҳар одамнинг мол-мулки алоҳида ҳисобланади. Бирга қўшиб ҳисобланмайди. Бу иккаласи ҳам закот беришлари керак эмас.

Савол: Аёлимни закотини ундан рухсат олмасдан бир фақирга бердим. Аёлим буни эшитгач рози бўлди. Закот саҳиҳ бўлдими?

Жавоб: Ҳа.

Савол: Закотимни бериш учун эримни эмас, ўғлимни, отамни, амакимни ёки тоғамни вакил этиб тайинласам мумкинми?

Жавоб: Албатта вакил қила оласиз. Улар сизнинг закотингизни ўз пуллари билан ҳам бера олади.

Савол: Эри закот бермаса, аёли бундан масъул бўладими?

Жавоб: Эр закот бермаса, аёли ва фарзандлари бунга масъул бўлмайди. Закот бермасликнинг кўплаб зарарлари бор. Бир ҳадиси шарифда “Закот бермайдиган жамият қаҳатчиликларга, инқирозларга дучор бўлади” деб марҳамат қилинган. (Табароний)